اللهم لك الحمد

الهم لك الحمد كما ينبغي لجلال وجهك وعظيم سلطانك .. البوست المرة دي رد على بوست " اللهم بصرني بالحق" والي قلق ناس كتير عليا بس أنا النهاردة بعد ما الحمد لله انتهيت من الموضوع الي كان بيقلقني بما يتوافق معايا ويحقق ليا السعادة قلت أجي أطمنكم عليا .

أنا الحمد لله كويسة جدا واخدت قرار ريحني قوي وده بعد استخارتي الدائمة لله سبحانه وتعالى الي كل مدى بحس بنعمه عليا والي أنا مش أهل لها وأنما لأنه كريم فهو بيعمللني بماهو أهل له ،

الموضوع كان قرار مصيري ولازم اخده وأخد قرار فيه بس الي زود الأمر عليا أني كل أما أخد مشورة حد في الامر من باب " لاخاب من استشار" الاقيه مأيد الموضوع قوي والتأييد ده مش جاي من اي حد ده جاي من أهلي وجاي من اصدقائي المقربين وده الي خلاني لوقت أو اخر اقلق من نفسي وأحس اني مش بأخد قرارت صح... مكدبشي عليكم من باب بري لاهلي قلت خلاص امشي الموضوع مع الاستخارة الدايمة واني اقعد لوحدي كتير ادعي ليه لانه هو بس الي حاسس بيا وبمكنون نفسي ولان الي شيفاه والي بحس بيه مش بحكيه لاي حد أنما هو سبحانه وتعالي حاسس بيا وحاسس بالي جوايا والي بيدور بيا .



المهم علشان مش اصدعكم معايا يشاء القدير العليم أن الامر ينتهي بما يتوافق معايا وزي ماكنت حابة... لا ونعمة ربنا عليا اني اسمع تأييد من الناس الي كانوا شيفين أن رفضي للموضوع مش صح الاقيهم بعد ما الموضوع خلص بيقولولي انتي كنتي صح وكان اختيارك سليم وده كانت فرحة غالية قوي اني الاقي ربنا جبر كسري من ناحية وثبتني على الصح ومن ناحية تاني خلاني اكتر ثقة في قرارتي ، أملي في ربي كبير أنه يدخل الفرح تاني عليا وعلى قلبي لانه هو وحده بس الي عالم بالي جوايا وإلى نفسي فيه وبتمناه منه في كل لحظة .


الخلاصة أن اما الدنيا تضيق بيكم ألجو إليه روحوه لخلقكم قبل أي شي هتلاقوه حنين قوي عليكم وكريم قوي معاكم وحاسس قوي بيكم علشان هو خلقنا مش هيضيعنا وده ثقتي فيه انه مهما تمر الايام مش هيضيعني وهيرجع ليا كل الي فقدته وهيكون كرمه كبير قوي معايا باذن الله.

كن جميلا ترى الوجود جميلا

ملحوظة: هذا الموضوع نشر في مدونتي السابقة " قلوب حائرة " وأنوه عن هذا لأن اثناء حديثي مع بنوتة بتابع مدونتي لقيتها بتقولي بعد نزول موضوع "طفلي ولست بطفلي" أن الموضوع ده قريته في "قلوب حائرة" قبل كده فضحكت وقلتها اصل أنا وهي واحد قامت قلتلي ازاي فهمتها اني انا صاحبة مدونة " قلوب حائرة" سابقا و "قلب ينبض بالحب" حاليا وأن كل الخواطر الي بكتبها دي كتبتها قبل كده من سنتين ولسة محتفظة بيها على ايملي ، ومن منبري هنا الي كان يعرف قلوب حائرة وقرا حاجات عندها تشبه الي بكتبه هنا فانا وهي واحد .

ندخل بقى على موضوع النهاردة

مر علي وقت كبير دون الحديث عن أى موضوع من مواضيع السيكولوجي بتاعت التخصص اللي درسته مايقرب من خمس سنين ، فجاءة وجدت بداخلي رغبة شديدة في الكتابة والحديث عن أي شي ذو صلة بدراستي ، ومن باب البعد عن التعقيدات وتناول موضوعات تجعل الآخرين في حالة من الملل مني ومن مدونتي ،اخترت موضوع خفيف للحديث عنه وهو " الثقة بالنفس " والذي يتم تعريفه في كتب علم النفس على أنها أحساس الانسان بقيمته وشعوره بذاته وأنه ذو اهمية في حياته وفي حياة الآخرين ،الأمر الذي ينعكس على تصرفاته بصفة عامة لدي أحساس أن في شخص ما يقرأ ويقول لسان حاله ماهذا الكلام الاكاديمي البحت ،نريد المختصر المفيد ،والطريق الميسر للوصول للثقة بالنفس دي ،واختصارا للوقت ورافة بالقارى ،هيا بنا نتحدث عن أبسط الطرق للوصول للثقة بالنفس.

أولا وقبل أن نسير في نقاط وفروع وأشياء من هذا القبيل ..لابد من أن نجلس مع أنفسنا ونصرحها بأننا قادرين على التغيير للأفضل ...كذلك علينا أن نترك أي فكرة قد تكون مسيطرة على تفكيرنا والتي من شأنها تقلل من قدرنا وذلك لسبب جميعنا مسلم به وهو أننا مخلوقين ولم نتحكم في خلقنا ولم نتدخل فيه ..لذلك فليس هناك اى مجال للاعتراض على هذا الخلق علينا أن نحدد هدفنا في الوجود في الحياة والهدف الاكبر في حياتنا هو عبادة الله سبحانه وتعالي فيقول تعالى " وما خلقت الجن والإنس إلا ليعبدون " واذا ما اديت ما عليك من فرائض فهذه خطوة قوية في طريق ثقتك بنفسك .

عليك أن تبحث عن قدراتك الكامنة في نفسك .... وأنك تملك موهبة عالية وعليك من اليوم أن تخرجها ، أبحث عنها باخلاص وستجدها بلا شك فلا يوجد انسان الا ولديه قدرة أو موهبة خاصة

كن على يقين أنك انسان لديك ثقة عالية فعندما تترسخ في عقلك فإنها تتولد وتتجاوب مع أفعالك ... فببساطة الانسان يكون كما هو متصور عن ذاته فاذا ما كنت ترى نفسك انسان قوي ستكون قوي واذا ما نظرت الى نفسك على انك ضعيف فستكون ولن تكون غير ضعيف ، فحب ذاتك ولاتعمل على التقليل من شأنها أنظر اليها كما لو كانت نفس اميرة أو ملك أو زعيم .زلا تعاملها على أنها نفس عبد أو ذليل أو نفس اقل من الآخرين

أن تركز اهتمامك في موضوعات بعينها وتعلم عنها الكثير سواء أكان ذلك عن طريق القرأءة أو الاستماع ،حينها ستستطيع أن تتحدث في شي تعلم عنه الكثير ، الأمر الذي يجذب الآخرين للاستماع اليك ابتعد عن البائسين المتشائمين لانك لن يعود عليك منهم غير الاحباط والاكتئاب و أحرص على مرافقة المتفائلين الإيجابين اجلس مع نفسك من الوقت للاخر وتحدث معاها وتعاهد معها على أن تعيشوا في أمان وسلام داخلي كن على يقين بأنك قادر على صنع القرارت وأنك قادر على رسم حياتك.

لاتجعل في حياتك مكان لكلمات مثل "لااستطيع " "لايمكنني " وأضع محلها " يمكنني عمله " و " أحاول " و" بأذن الله هستطيع " تمسك بمواقفك إذا كنت تعتقد تمام الاعتقاد في صحتها، ولاتتنازل عنها بأى صورة فالتنازل وانت على علم بصحتها ،ماهو الا امر يودي بك الى هزيمة نفسك، لاتعاند مع نفسك وأسمع إلى الأخرين ولا تجعل الغضب يؤثر في قرارتك، أخيرا لاتجعل للهروب في حياتك اى مكان واجعل سلاحك الدائم المواجهة مهما كانت نتائجها ويكفيك شرف التجربة واجعل الله دائما نصب عينيك في السر والعلن وأجعله دائم معك بالمحافظة على طاعته فهو خير حافظا لك

يأهل أسكندرية يا غاااااااااالييين عليا

ااااااااااااه مهما حكيت ومهما قلت عن جمالها مش هقدر اوفيها حقها، عروووووسة والله عروسة ياولاد .. يوم الجمعة إلى فاتت طلعت رحلة إلى الاسكندرية يمكن دي مش اول مرة اروحها بس المرة دي كانت مميزة يمكن لان المرات الي فاتت كانت في شغل والمرة دي فعلا كانت رحلة ترفيهية .

بس بجد احساس مش عارفة اوصفه من أول مرورنا من البوابة عارفين الاحساس الي بنحسه لما بنشوف حد وحشينه قوي ويقوم واخدنا في حضنه وفجاءة نلاقي نفسنا مش حسين بهموم ولااي شي بيعكر حياتنا ، الاحساس ده حسيت اول ماقعدت على الشاطي أول ما قعدت حسيت زي ما بيكون بيضمني ليه قوي وبياخدني في حضنه بياخد مني احزاني وهمومي وكل الي مزعلني وبيديني فرح وأمل وحب ونشاط ، الاحساس ده محستهوش قبل كده على الرغم اني كنت في اسماعلية من ثلاث أو اربع شهور بس وانا في اسماعلية كنت حاسة اني انا الي بتكلم مع البحر وبحكيله وهو بيسمعني المرة دي وانا قاعدة على شاطي المنتزه حاسة ان الطبيعة الي بتتكلم معايا ميا وهواء وشمس كلهم بيحاولوا يدوني حب وامل ونشاط زي مايكونوا بيلعبوني أو يناكفوا فيا يا بجد فعلا اسكندرية سااااااحرة ولو ربنا امد ليا في عمري مش هتكون اخرمرة الصيف ده وهزورها باذن الرحمن مرات تانية .

كوبري المنتزه الي من فوقه تتجلي عظمة الخالق في رؤية لون البحر الازرق على يمينك والجانب الاخر ترى المياه في لون لبني سبحان الخالق .

مش عارفة ااقول عليها أيه غير زي ما قلت لشيرين رفيقة الرحلة أن استحالة اهل اسكندرية يكون بيجلهم اي امراض نفسية كفاية جمال المدينة والقعاد على الكورنيش وان يكفي لاي واحد زعلان شوية ينزل يتمشي على كورنشها ويلاقي نفسه بقى مفرفش واخر روقان .


اليوم بصراحة من أوله كان رائع بداية من اتصال شوشو بيا بعد الفجر وانها هتفوت تاخدني من حلوان واترحمت من ركوب المترو ووصلونا إلى المهندسين وركوبنا الاتوبيسات والجو العام مع الزملاء الي علاقتنا فعلا تعتبر علاقة اسرية وعلى درجة عالية من المودة الحمد لله، والمنح إلى بتتبعت من ابيه أسامة خطيب البنت أميرة من "أم علي ومصاصات الي طبعا كنت موصياه عليها قبل الرحلة بيومين" وفعلا جبها ووفى بوعده " ربنا مايحرمنا منك يابابا سمسم" ، ووصولا للشاطي والجلوس عليه، وبداية نشاطي في مناكفة خلق الله ، وطبعا مافيش طفل اترحم مني في الرحلة يعني من الاخر الي معاها عيال وناوية تتطلع رحلة انا هطلع فيها تستعوض ربنا في ابنها .




طبعا المناظر الي في المنتزه غنية عن الكلام وبجد دعوة لاي حد مضغوط او مقريف حبتين يطلع اسكندرية يغير جو هيرجع زي الفل ومية فل وعشرتين مش عشرة واحدة وبجد ياغاليييييين عليا يا أهل اسكندرية .








ملحوظة: بعد ما نشرت البوست شوشو الهانم بتاعت ايامنا الحلوة الي هي انتختي بقلها نزلت البوست قامت قالتلي كتبتي انها بعدستي... قمت بصيت لها وقلتلها لا طبعا ....ولان المحرر الشريف لازم يقول المصدرالي واخد منه فأنا قلت أدخل انوه ان الصور دي يا كماعة بعدست شوشو تؤام الروح لأن ممكن قوي ترفع عليا قضية وتقول اني سارقة الصور وتطلب تعويض كبير... قوية ومفترية وتعملها ...اللهم بلغت اللهم فاشهد.

طفلي ولست بطفلي

طفلي .. نعم اقولها فاأنت طفلي الذي لم يحمله رحمي

قد عودته بنفسي على التدليل والآن اتحمل عنائه

قد اعتاد على ان يستأثر بمشاعري

طفل يعشق ان ينفذ ما يريده وان يحصل على ما يتمناه مني

ويعرف أن حبه نقطة ضعفي فيخطأ محتميا بحبي

يبحث عني وقت فرحه لأشاركه فيه

طفل يشتاق الي في جرحه لأخففه عنه

يأتيني متعب من عمله لاعوضه عن تعبه بحناني

اعتدت على غضبه لاني اعلم انه غضباً وقتي

ثم يأتي الي طالبا عفوي وسماحي

ويحلو له معاملة الاطفال

طفل وما انت بطفل ولكني انا الذي جعلتك طفلي.

أكفلهم بوقتك ... كل سنة وكل يتيم في حنان وحب

طبعا زي مأحنا عارفين الجمعة الجاية دي أول جمعة في أبريل وزي ماهو متعرف عليه بتكون معروفة بما يسمى بيوم اليتيم ، وبنلاقي في الغالب أغلبية الأسر متوجهة في اليوم ده لدور الأيتام من باب أدخال البهجة والسعادة على نفوس الاطفال الايتام وشراء بعض اللعب والحلويات لهم واصطاحبهم في رحلة خارجية أو عزومات في بيتوهم ، ده كله رائع وأمر أكيد بيدخل السعادة والسرور على نفوس الاطفال ولكن في شي أغلبية الناس ممكن ميكنش واخدين بالهم منه وأنا واحدة من الناس الي قبل ما يكرمني ربي بالعمل مع الاطفال دول لمدة اربع سنين كاخصائية نفسية مكنتش اعرفه.

الا هو أيه أن في أمور بتبقى أهم من الحلويات واللعب بالنسبة للاطفال أنه يشعر أن في حد حريص على السؤال عليه بصفة مستمرة مش مجرد يوم واحد يجي ويزوره في يوم واحد ويفرحه ويرتبط به الطفل ولايراه الا مرة اخرى الا بعد مرور عام، شعور الطفل بأن في انسان بيهتم بامره بيبقى ليه قيمة كبيرة قوي بالنسبة له أن يشعر أن ليه حد يربطه بيه علاقة غير قائمة على مصلحة ده امر رائع بالنسبة ليه ، ممكن كلمة مصلحة دي تخلي البعض يقف شوية ويسال مصلحة ايه هقولكم ايه تفسيرها الاطفال في الدور بيبقوا شايفين ان كل الي حولهم علاقته بيه علاقة نفعية يعني الامهات البديلة الي معاه بيقدموه ليه حنان علشان ده شغلهم كده والمشرفين كمان نفس الوضع ومديرة الدار لانها حريصة على أن تظهر انها قايمة بدورها في رعاية الدار، لكن اما بيلاقوا أن في حد بيهتم بيهم من الخارج وبيحرص على زيارته هو وامره ليه اهمية عنده ده بيرفع عنده الثقة بنفسه الي بيبقى نسبة كبيرة منهم مفتقدنها.



متتصوروش فرحة طفل أو طفلة يتيمة بأن أحد المتكفلين بيه هيجي في زيارة ليها ويقعد ويتكلم معاه ويسالوه عامل ايه في الدراسة وفي حياتك ، أنه يشعر أنه مش جاي علشان ياخد ثواب بس بمجرد انه يضع في ادارة الدار مبلغ باسم الطفل ويمشي من برة برة دون السؤال عليه .



يكفي أني ااقول أن ضمن برامج تعديل سلوكهم انه كانت من المدعمات اننا نسمح ليهم بزيارة كفيل أو الخروج معاه ، والي اي درجة كان بياثر في الطفل لو قلنا له انه في حالة عدم الالتزامه مش هنسمح بزيارة الكفيل ده .



ياريت السنة دي نحتفل بيوم اليتيم بصورة أكتر ايجابية بأننا و أحنا راحيين للاطفال دول نكون في النية أنه هيبقى ليهم زيارة دوريه مرة اسبوعيا او كل اسبوعين أو كل شهر حتى المهم، منهجرش الاطفال دول بجد الاطفال دول محتاجنا محتاجين يشوف العالم من خلالنا، محتاجين نقعد معاهم ويقعدوا معانا يتعلموا منا القيم والعادات والتقاليد في حاجات كتير ممكن نعلمهاليهم من خلال قاعدنا معاهم واحتكاكنا بيهم ، وده صورة من صور الكفالة وهتاخد عليها ثواب حتى لو مش بتملك مال فانت بتنفق من وقتك بالجلوس معاهم والقيام على امورهم الي قال في حقها الرسول أن القائم على امر اليتيم والارملة كالمجاهد في سبيل الله، في كفالة اهم من كفالة الاموال بكتير وسبحان الله قد يون ليس من يملك مالا لكفالة هولاء الاطفال ولكنه يملك علم اوو يملك وقت يجلس مع هولاء الاطفال .. جوايا كلام كتير عاوزة ااقوله بس المشاعر الي هتحسوها مع الاطفال دول اكبر واكتر كل سنة وكل يتيم بخير وكل سنة وحياتهم مليانة بالحنان ... ويريت لو في حد عاوز يضيف اي شي على كلامي ياريت يتكرم بيه في التعليقات وجزاكم الله خير