الأحد، 12 أبريل 2009

يأهل أسكندرية يا غاااااااااالييين عليا


ااااااااااااه مهما حكيت ومهما قلت عن جمالها مش هقدر اوفيها حقها، عروووووسة والله عروسة ياولاد .. يوم الجمعة إلى فاتت طلعت رحلة إلى الاسكندرية يمكن دي مش اول مرة اروحها بس المرة دي كانت مميزة يمكن لان المرات الي فاتت كانت في شغل والمرة دي فعلا كانت رحلة ترفيهية .



بس بجد احساس مش عارفة اوصفه من أول مرورنا من البوابة عارفين الاحساس الي بنحسه لما بنشوف حد وحشينه قوي ويقوم واخدنا في حضنه وفجاءة نلاقي نفسنا مش حسين بهموم ولااي شي بيعكر حياتنا ، الاحساس ده حسيت اول ماقعدت على الشاطي أول ما قعدت حسيت زي ما بيكون بيضمني ليه قوي وبياخدني في حضنه بياخد مني احزاني وهمومي وكل الي مزعلني وبيديني فرح وأمل وحب ونشاط ، الاحساس ده محستهوش قبل كده على الرغم اني كنت في اسماعلية من ثلاث أو اربع شهور بس وانا في اسماعلية كنت حاسة اني انا الي بتكلم مع البحر وبحكيله وهو بيسمعني المرة دي وانا قاعدة على شاطي المنتزه حاسة ان الطبيعة الي بتتكلم معايا ميا وهواء وشمس كلهم بيحاولوا يدوني حب وامل ونشاط زي مايكونوا بيلعبوني أو يناكفوا فيا يا بجد فعلا اسكندرية سااااااحرة ولو ربنا امد ليا في عمري مش هتكون اخرمرة الصيف ده وهزورها باذن الرحمن مرات تانية .


كوبري المنتزه الي من فوقه تتجلي عظمة الخالق في رؤية لون البحر الازرق على يمينك والجانب الاخر ترى المياه في لون لبني سبحان الخالق .



مش عارفة ااقول عليها أيه غير زي ما قلت لشيرين رفيقة الرحلة أن استحالة اهل اسكندرية يكون بيجلهم اي امراض نفسية كفاية جمال المدينة والقعاد على الكورنيش وان يكفي لاي واحد زعلان شوية ينزل يتمشي على كورنشها ويلاقي نفسه بقى مفرفش واخر روقان .


اليوم بصراحة من أوله كان رائع بداية من اتصال شوشو بيا بعد الفجر وانها هتفوت تاخدني من حلوان واترحمت من ركوب المترو ووصلونا إلى المهندسين وركوبنا الاتوبيسات والجو العام مع الزملاء الي علاقتنا فعلا تعتبر علاقة اسرية وعلى درجة عالية من المودة الحمد لله، والمنح إلى بتتبعت من ابيه أسامة خطيب البنت أميرة من "أم علي ومصاصات الي طبعا كنت موصياه عليها قبل الرحلة بيومين" وفعلا جبها ووفى بوعده " ربنا مايحرمنا منك يابابا سمسم" ، ووصولا للشاطي والجلوس عليه، وبداية نشاطي في مناكفة خلق الله ، وطبعا مافيش طفل اترحم مني في الرحلة يعني من الاخر الي معاها عيال وناوية تتطلع رحلة انا هطلع فيها تستعوض ربنا في ابنها .




طبعا المناظر الي في المنتزه غنية عن الكلام وبجد دعوة لاي حد مضغوط او مقريف حبتين يطلع اسكندرية يغير جو هيرجع زي الفل ومية فل وعشرتين مش عشرة واحدة وبجد ياغاليييييين عليا يا أهل اسكندرية .








ملحوظة: بعد ما نشرت البوست شوشو الهانم بتاعت ايامنا الحلوة الي هي انتختي بقلها نزلت البوست قامت قالتلي كتبتي انها بعدستي... قمت بصيت لها وقلتلها لا طبعا ....ولان المحرر الشريف لازم يقول المصدرالي واخد منه فأنا قلت أدخل انوه ان الصور دي يا كماعة بعدست شوشو تؤام الروح لأن ممكن قوي ترفع عليا قضية وتقول اني سارقة الصور وتطلب تعويض كبير... قوية ومفترية وتعملها ...اللهم بلغت اللهم فاشهد.

هناك 16 تعليقًا:

أيامنا الحلوة يقول...

ايون كده ناس مبتجيش الا بالعين الحمراء ايه الصحافةالصفراء دي انسبوا الصور لاصحابها بقى ياعالم

المهم يابدورة اننا استمتعنا في الرحلة الكميلة دي وكل رحلة وانتي طيبة وعقبال ما تروحيها في شهر العسل مع زوج صالح يستحقك بامر الله

تحياتي

قلب ينبض بالحب يقول...

ايامنا الحلوة
***********

اهلا اهلا ياحضرة الصحفية الشريفة على اعتبار اني صحفية من بتوع الصحافة الصفراء...ههههههههههه ماشي ياشوشو هانم كده تشهري بيا ماشي ماشي

اكيد الاستمتاع بالرحلة دي لاننا كنا مع بعض صحبة خير وملينا الحب دمتي بكل الود وبعدين ماشي ياشابة على الدعوة الكميلة دي ودمتي ليا صديقة وأخت وحبيبة

على الطريق يقول...

ههههه .. رحلة كانت جميلة بيكي وكمان جميلة بناس تانية

المهم انك اتبسطي بالمصاصة وام علي واكيد بصحبتك مرمر بردوه

قلب ينبض بالحب يقول...

على الطريق
*********
ههههههههه اكيد انتي استمعتي اكتر بالناس التانية يااروبة هانم واحنا اكيد استمتعنا بالمصاصات وام علي دمتي لي اخت وصديق ودام خطيبك وزوج المستقبل اب واخ اكبر لينا

GiGi world يقول...

واصلا قمر زيك اللى يعنى اللى يدايقها
ايه يابنتى انتى مش عارفه قيمه نفسك
رحله سعيده ويارب تفرحى دايما حاسه بالسعاده قوى فى كلماتك يارب يديم عليى نعمه الحب
على فكره انا كنت كتبتلك يلام عندى فى المدونه انتى وكل المدونين الاعزاء علشان مش كنت عارفه ادخل مدوناتكم بسبب مشكله الريدر
بحبك جداااااااااااااااااااااااااا

بيتنا القديم يقول...

وحدووووووووووووه
احم احم
سلامتها ام حسن..!
يووووووووووه..
قصدي سلامو عليكو..
بداية يا أستاذة بدرية يا صحفية..
الف هنا وشفا انت والآنسة شرين عالمصاصات..
وربنا يمد في عمرى كده انا ومرمر ونجيبلكم مصاصات مع أطفالنا بإذن الله
ماهو أصل انتم زي اطفالنا ...
ثانياً:فعلاً المنظر جميل ورااااااااائع
وكما قال القائل مش في اجمل من الطبيعة والوجه الحسن
قصدي الوجه المرمري الكميل العسولة
ثالثاً وده المهم انا اعرف حكيم يا بدرية لعلاج حالات الشيزوفرينيا والحديث مع البحر والصخور وكوبري المنتزة..دكتور شاطر ومش حياخد منك حاجه غير لما تحسي بتحسن وتعرفي ان البحر لا يتكلم مع احد ولا يُكلممن احد...
فقط يقذف بالاحساس الجميل في قلب عاشقين جمع الله بينهما ..يشعر هو ان البحر يجري فقط في مقلتيها..وان الغرق في قلبها حياة..وان الموت على شاطئها بعث جديد..يرى شريانه ينبض في قلبها..ويرى دموعه تتفتح زهراً بين رموشها..يعشق الكلمات من بين شفتيها..يشعر انها حوريته التى استبطئت عودته الى الجنة..فبادرت هى بالمجئ إلي الأرض..يسرد لها كل كلمات الحب التى يعرفها البشر..بكل اللغات..ثم يعجز لسانه ان يترجم ما يجول في قلبه وخاطره..حينما يراها يقع في حيرة شديدة..ويظل يفكر كيف يعبر عن معان كثيرة لا تسعها الكلمات..تدمع عيناه وهو يطيل النظر الي عينيها..حبها كالنهر والبحر..كالنهر في حنانه وروائه..وكالبحر في عنفوانه وجبروته وامواجه المتدفقة....
عندك وقت ولا كفاية كده..!!
بالحق الحكيم أجازته من السبت للسبت وبقية الاسبوع بيفتح بعد الظهر وبيقفل قبله..وكما نوهت قبل هالحين مش بياخد فلوس لحد ما تحسي بتحسن..ايه قولك؟!..

بنت الغربة يقول...

انا ماليش دعوة ..انا عايزة ارووح اعيش فى اسكندريه...
ايه الجمال والحلاوة دى ...؟؟؟
انتى عارفه ماما قعدت 4 سنين فى جامعه اسكندريه وماكانتش عايزة ترجع القاهرة تانى ..
انا بحبها فى الشتاا اكتر من الصيف لانها اهدى جدا فى الشتاا...
تحياتى ليك ياقمر ولكل اهل اسكندريه

صيدلانيه طالعه نازله يقول...

اسكندريه فعلا بلد جميله فعلا سواء الاماكن او الناس او كل حاجه فيها سبحان الله رائعه انا رايحه يوم الخميس لان ماما و بابا هناك حاليا و انشاء الله انبسط زيك و ارجع بقى استعد للامتحانات بتاعه الولاد

!!! عارفة ... مش عارف ليه يقول...

بين شطين وميه
عشقتهم عينية
يا غالين علية
يا اهل اسكندرية

شكراً جزيلاً لك
على الرحلة الجميلة اللي اخدتينا فيها لاسكندرية معاكي
والشكر موصول لصديقتك شوشو

دومتي بكل خير
وليد

mostafa rayan يقول...

صحيح زي ماقال عمنا احمد فؤاد نجم اسكندرية مارية .. وترابها زعفران
ربنا يفرحك دايما

قلب ينبض بالحب يقول...

جيجي
***
منوراني دايما ياغالية وتسلمي على الكلام الرقيق ده بالنسبة للي مضيقني مافيش حد حياته على منوال واحد وهتلاقينا كل وقت بحال دمتي ودامت السعادة في حياتك وانا شفت كلامك الحلو قوي عليا تسلميلي يالي معزتك عندي غالية قوي

قلب ينبض بالحب يقول...

بيتنا القديم
*************
هههههههههه ماشي يا ابيه سمسم ربنا يخليك الوجه المرمري ويجمعكم على خير يارب يارب ويسعد قلوبكم بكل الخير ويخليك لينا علشان تجيب لينا المصاصات ههههههههههه

قلب ينبض بالحب يقول...

بنت الغربة
*****
خلاص اول نزول ليكي مصر باذن الله نروح اسكندرية ونشم الترابها وننزل ميتها ونتفسح دمتي بكل الخير سلامي للاولاد ولزوجك

قلب ينبض بالحب يقول...

صيدلانية طالعة نازلة
****************
اهلا يادكتور منوراني والله ، يابر تكون اجازة سعيدة عليكي وعلى الاولاد وربنا يعينك على موسم الامتحانات يارب

قلب ينبض بالحب يقول...

عارفة مش عارف ليه
***************
فين باقي الاغنية يافندم ، يالا اي خدمة خدتك لرحلة عبر البلاد العربية اهو ان شاء تيجوا بالسلامة لرض الوطن وتنورها وتنوروا اسكندرية

قلب ينبض بالحب يقول...

مصطفى ريان

*********
ربنا يكرمك يا مصطفى ومبروك على اول ظهور تلفزيوني ليك يافندم وبالتوفيق يارب

إعلانات

المشاركات الشائعة