الأربعاء، 30 ديسمبر 2009

سنة راحت بالسلامة وسنة جاية بابتسامة



كلها ساعات وهنودع سنة كاملة وهنستقبل سنة جديدة أتمنى من الله أن تكون سنة مليانة بالسعاادة علينا كلنا، بس العبرة مش بسنة مرت من عمرنا وسنة جديدة هتتبتدي العبرة مش بالأيام الي بتمر بينا ...العبرة بالي عملناه فيها وقدرنا ننجزه فيها .


لو بصينا لحالنا هنلاقي أن أغلبنا بيعيش بعشوائية قوي يعني بيصحي من النوم إلى بيروح شغله ويجي منه ويقعد قدام التلفزيون أو الكمبيواتر أو بينزل يخرج مع صحابه أو يقعد على القهوة أو لو بنت يبقى شغل وترتيب البيت وغيرها من امور نسائية ...هنلاقينا عايشين حياتنا كده من غير هدف فيها ...اه اغلبنا عايش من غير هدف بيبدء يومه ويقعد يستني نهايته مش راسم ليوم هدف يطلع بيه بيصحي علشان ينام .


هلاقي حد هيقولي بطلي فلسفة... دي مش فلسفة أحنا جاين وعايشين على الارض لهدف كل واحد منا لينا هدف في حياته ،ربنا أما خلقنا كان خلقنا علشان نعمر الارض نفيد ونستفيد مش علشان ناكل ونشرب وننام ونتجوز ونخلف وبس ده كله حلو بس مش كل شي .. بداية السنة الجديدة فرصة للوقوف مع النفس والمراجعة وأحدد ياترى أيه هدفي


_ علاقتي بربي هل محتاجة تتقوي وتبقى في حالة أحسن


_ علاقتي بأهلي محتاج أقويها وأصل رحمي ولا أنا كده شكرا


_ علاقتي بمعارفي هل محتاجة اصفي نفسي من كل زعل شيله من الناس واكون صافي ولا هفضل شايل من الي حواليا وفاكر ليهم كل شي وحش


_ عملي هل محتاج اطور نفسي في بعض المهارات ولا أنا كده تمام والحمد لله


_ للمتزوجين علاقتنا بالطرف التاني هل هي على مايرام ولا الامر محتاج لعمرة وتجديد وتتطوير


_ علاقتي بزملائي واصدقائي ياترى خسرت مين وكسبت مين ومين غلطت في حقه ومين انا تمام معاه



أكيد في أمور تانية غير الي ذكرتها بس بجد الايام الي بتعدي مش هنعرف نرجعها ، محتاجين نقف واقفة نفتكر ايه الي قدرنا نحققه وايه الي مقدرناش وليه مقدرناش نحققه .



كمان محتاجة الي يدخل هنا يشركني بأوقاته السعيدة الي مرت عليه في 2009 ويتمنى ايه في 2010 انا هبدا اهو


طبعا 2009 شفت فيها أغلى إنسان ليا بعد أمي وأبويا وأخواتي وهو روح قلب خالتوه وحياتها كلها والي هيدخلها المورستان قريب "حمادة" ذلك الملاك الذي عندما يضحك اشعر بالدنيا ضحكت ليا في ضحكته.


كمان كان فيها فرح اخويا الغالي واختي الغالية سمسم ومرمر وربنا أكرمهم ببناء اسرة سعيدة.


كمان خبر قراية فاتحة أعز اصدقائي على قلبي دعواتكم بالخير ليها


كمان في 2009 بقيت صافية قوي وقدرت اسامح ناس كتيرة واصبح قلبي ولساني لايحمل لهم غير كل الحب في الله


وايه تاني يابيبيو وايه تاني والله في نعم كتير ربنا اكرمني بيها بس مش حاضرة الان على البال .



المهم اتمنى أن 2010 تبقى فيها كل مايرضى عليا ربي وأهلي ويسعد أختي وزوجها وابنها ويكرم اخي في دراسته ، واتمنى لكل الي اعرفهم كل خير وكل ما يتممنوه وكل سنة وأحنا بالف خير وسعادة وحب ونقاء وصفاء وهدوء بال يااااااااااااااارب وفي الاخر بحبكم لاخر نفس ليا في الحياة

هناك 9 تعليقات:

اقصوصه يقول...

كل عام وانتم بخير

وعساها تكون سنه زاخره بالطاعات

اعشق فى الليل ضوء القمر يقول...

كل عام وانت بخير
ولله اقرب
أتمنى تكونى افضل ما تريدين

GiGi world يقول...

انا بحبك قوى يادودو يااغلى بيبو فى الدنيا


يارب يابيبو يسعد ايامك ويرزقك بكل خير
انتى نقيه قوى ياقلبي وروحى


انا بجد بحبك قوى
يارب اليرزقك بكل خير عاجلا غير اجل ويفرك بحماده النونو ومامته وباباه ويسعدكم يارب ويكرم اخوكى يارب

ربنا يسعدك يارب دايما ويرزقنا الجنه صحبه يارب

bos bos بسمه عبدالباسط يقول...

إيه ده أسمى مش مكتوووووووووووووب

أمممممممممممممم

طيب عقابا ليكى بقى الموضوع الجاى هيكون أجابتك على التاج اللى عندى

نييييييييييييياها

أميرة الاحزان يقول...

كل عام وانتى الي الله اقرب وعلى طاعته ادوم
وربنا يحققلك كل امانيكى
تحياتى

(green eyes) يقول...

كل سنة وانت بخير
ويارب تحققي كل اللي بتتمنيه

صيدلانيه طالعه نازله يقول...

كل سنه و انتى طيبه يا بيبو
و ان شاء الله السنه الجايه نباركلك على فرحك يا جميله
و يحقق لك كل امنيه تانيه تتمنيها

!!! عارفة ... مش عارف ليه يقول...

افتكر إن اجمل احداث 2009

على المستوى الشخصي

إني في رمضان اللي فات

شاركت مع المدونين في الفطار الجماعي بمستشفى ابو الريش

ويومها شوفت ناس كتير كان نفسي ايو اشوفهم بالنسبة لي زي نجوم السينما

وفعلا كنت حاسس إني في وسط نجوووم


وعلى فكرة عجبني اوووي الوقفة مع الذات اللي عملتيها في البوست ده لتقييم الاداء علشان السنة الجاية نقدر نكون فيها افضل من السنة دي

وكل سنة وانت طيبة :)

momken يقول...

سيبك انتى

الصوره حلوة اوى اوى اوى

الصوره عجبانى اخر حاجه


كل سنه وانتى طيبه


تحياتى

إعلانات

المشاركات الشائعة