إلى متى ؟

إلى متي يانفس ..إلى متى ؟

غريبة الناس

غريبة الناس غريبة الدنيا ديا ..................وااااااااااااااااااااااااااااه من الدنيا ديا

كلمات أغنية مرت على مسامعي ومررت معاها امور أخرى

في يوم الحب ..بحبكم قوي

على الرغم من أني لبسة النهاردة طقم لونه أحمر الا أني مش قاصدة اني البسه .. بس هقولكم أول ما دخلت الشركة قبلت بنوتة امورة على السلم ولاقتها بتقولي هابي زنلاطين يابيبو ...يااحمررررراتك قلتلها والله ابدا مش الي في بالك خالص انا لبسة الطقم عادي ضحكت وسكتت.

شويتين وطلعت اجيب الشاي باللبن بتاعي من البوفيه لقيت البت دودو صحبتي بتقول هابي بلانطين يا بيبو قلتها وانتي بخير ياشابة ..بس انتي عارفة الي فيها يادود.. قالتلي يابت انتي انتي مش بتحبينا وبتحبي كل الي حواليكي قلتلها بالفعل ...قالتلي خلاص بقى يابيبو يبقى مدام في قلبك حب لكل الي حواليكي يبقى هابي فلانتين عليكي .



المهم اما نزلت وفكرت في كلامها قلت البت دي كلامها منطقي ومية مية ولاقتني فعلا أني بحب كل الناس الي أعرفهم قوي ولازم أقولهم بحبكم فقلت اكتب كلمتين عنهم:

لامي وأبويا : بحبكم قوي قوي قوي لأنكم لولا وجودكم مكنتش انا بحبكم قوي لأنكم بجد شمسي الي مدفياني وقمري الي منورلي حياتي وربنا ما يحرمني منكم ولا من دعائكم.

لاصحابي: أنتوا عارفين أن لولاوجودكم في حياتي أنا مكنتش هقدر اتخطي أي ظروف حصلت ليا في حياتي وقفتكم جنبي ومساندتكم ليا خلتني اتماسك وأبقى كويسة وربنا يخليكم ليا ودايما تكونوا جنبي ودون داعي لذكر أسامي انتوا بجد غاليين عليا وربنا يباركلي فيكم وأشوفكم في كل خير يارب.

أوشا وسيد: بجد مهما قلتلكم على حبي ليكم مش هقدر أعبر.. طبيعي ياأوشا أني أحبك لأنك أختي بس الحب الي جوايا ليكي ده مش عارفة ليه مش حساه حب أخت لأختها حساه حب أم لبنتها ..على الرغم أن الفرق بنا في العمر ثلاث سنين، سيد مكنتش بالنسبة ليا جوز أخت مش عارفة أقولك ايه والله يابني وجودك فرق معايا جامد وفي كام موقف كده استجدعتك فيهم قوي على الرغم انك دايما مبتحبش تدخل في حياتي الا أنك من وقت للتاني بحسك عاوز تتطمن عليا ربنا يكرمك بكل خير.

حمادة: أنت بقى والله ماعارفة أقولك أيه بس والله يابني انت دنيتي وحياتي ومش عارفة الحب ده كله ليك جايبه منين، حاجة كده تشبه الملاك يانهاري بتفرق معايا قوي أما برجع والاقيك في البيت والله بتخلي الضحكة تتطلع من قلبي ياروح قلبي، تعرف أني بحبك من قبل أما أشوفك وتعرف كمان أني كنت متوقعة ملامحك وشكلك وتقاطيعك ، تعرف كمان اني نفسي اشوفك راجل كده وتكون فاهم الرجولة صح زي والدك ماهو لازم تشبه باباك ..نفسي أغمض عنيا وأفتحها الاقيك كبير وتكلمني وتقولي أنا كمان بحبك ياخالتو ياااااااااااه تعرف بكتب ودموعي في عنيا بحبك قوي يابني الي مشلهوش رحمي .

بلبل: طبعا لو قلت الحنية والجدعنة والرجولة هتبقى أنت يا بلال على الرغم أني الكبيرة بس بجد في أوقات كتيرة بحسك انت الكبير ياواد بحسك كده سابق سنك وعقلك الله اكبر عليك ربنا يخليك ويحفظك ليا ..كتير بنتشاكل بس والله انت غالي عندي قوي وعارفة غلاوتي عندك وعارفة أنك نفسك تشوفني في أحسن حال ..بلال حبيبي يااخويا ربنا يكرمك يااغلى أخ في حياتي.

لكل الي عرفتهم ودخلوا حياتي وتعاملت معاهم بجد بجد بجد بحبكم وبتمنى ليكم كل خير في حياتي وربنا يكرمكم ويجزيكم كل خير ويبارك ليكم في حياتكم ويجعل حياتكم كلها حب في حب يارب.

دكر بط

الصبح خارجة من البيت وحالتي المزاجية ميت فل وعشرتاشر وده بفضل كوب اليانسون الي الحاجة شربتهولي بالعسل الابيض الي شربته اجباري بعد جولة من الجري وريا في الشقة " بدل مج الشاي عااااااا" مع دعوتين حلوين وماشية وانا مفرفشة كده ومتسلطنة وايه كاني فراشة بتطير في السماء ده لاني قريبة من السما بحكم طولي يعني

قم ايه ركبت الميكروباص ، وانا مزئططة كده وفريش خالص ، لكن منه لله "دكر البط" الي نرفزني وخلى الدم يطلع لنفوخي وكنت هيجري لي حاجة ... هقولكم اهو مين "دكر البط" ده .. وانا راكبة الميكروباص وبعد يجي ساعة كده وربنا اكرمنا والميكروباص خلص تحميل وده لان النهاردة اجازة رسمية بمناسبة ذكرى التاسع من اكتوبر ...الا والاقي صوت طفل بيعيط ابص يمين وابص شمال اشوف الصوت ده جاي منين مش شايفة حاجة ..قلت بيني بهلوس ياولاد وده نتيجة لاني مبطلة الشاي يجي من عشر ساعات كده ... بس لاقيت الصوت علي تاني ... ابص مش لاقيا حاجة ...قلت بس انتي محيرة نفسك ليه يابيبو دي تلاقيها رنة جديدة للموبيل بس انتي مش واخدة بالك لان موبيلك ماركة " الي فات قاديمه مات"..

المهم ماعلينا وصلنا ونزلنا من الميكروباص وانا نازلة لقيت الصوت تاني بصيت والحمد لله لاقيت المصدر اتاريه كان طالع من جنب عمو الي كان قاعد قدامي وانا فاكره انه هو الي قاعد لو حده في الكرسي ومستغربة قاعد ليه على الكرسي الي بيقعد عليه اتنين بس اتاري كانت مراته قاعدة جنب دراعه وشايلة الولد وانا نظري ضعيف ومش واخدة بالي منهم وده لان عمو ماشاااااااااااااء الله فور باي فور



المهم عمو مشي قدامي هو و طنط مراته .. وعمو بسم الله ماشاء الله عليه ...حاطط ايده الاتنين في جيوبه وابص على طنط مراته الاقيها شايلة شنطة البيبي في ايد وشنط هدوم البيبي في الايد التانية والولد بيعط ..بعيد عنكم انا شفت المنظر ولاقيت وشي احمر والدم نطر في عروقي وضرب في راسي واتجننت ..ولاقتني ماشية بكلم نفسي هو ياربي البعيد باااااااارد ولا ماله شايف مراته شايلة الولد وشايلة الشنطة وسامع بكاء ابنه مش شيله عنها شنطة علشان تعرف تشوف الولد ماله بيعيط ليه بدل ماهو عامل زي " دكر البط" الي ريشه منفوش والا البعيد ماله ياربي مبيحسش.. المهم انا بصيت ليهم مرتين والولد بيعيط وهما ماشيين ورايا ان البعيد يفهم ابدا انه يحس ابدا



المهم دخلت ركبت المترو وانا قاعدة دماغي هينفجر وبسال نفسي ...هي الرجوله راحت فين ...اختفت ولا ايه ولا الراجل بيكون في مواقف معينة راجل " وقت ما بحيب يكون راجل" وموافق تانية لا ...وازاي البعيد يوافق انه مراته تمشي شايلة ده كله وهو ماشي كده هي الجارية الي والده ووالدته اشترالهالوه ولاايه.. وانا سالت نفسي وقلت اكيد هو برضه طلع لاقى والده بيعامل والدته كده علشان كده ده مش غريب عليه بس برضه ده مش يشفع ليه ...وبعدين فكرت وقلت ماهو لو فاهم الاسلام صح وازاي كان الرسول الكريم بيعامل زوجاته كان عرف ان الاسلام والدين مش صلاة وصوم وبس ده نظام حياة ومن نظام الحياة اننا نعامل زوجاتنا بالحسنى ..الي رسولنا الكريم كان بيعامل بيها زوجاته لدرجة انه كان بيامر الي بيسوق الجمال يسوقها بهدوء اما يكون نسائه في الهودج ... الموقف بجد غظني يمكن لاني الحمد لله اتربيت على التعاون وشفت ناس قريبة جدا مني بيعاملوه زوجاتهم باسلوب كويس وحطنهم في عنيهم الموقف نرفزني ... بس بجد ياريت الرجالة يكونوا رجالة بجد مش " دكر بط " والسلام ... والي بقى ماشاء الله منتشرين قوووووووووووووووي اليومين دول