الخميس، 20 أكتوبر، 2011

الي فات كان حلو بس الي جاي أحلى

من يومين كده البنت شيرين توضعت كده وهب لقتها بتقولي انها جاية تزورني فطبعا انا انشكحت جدا لاننا على الرغم انها تسكن فوقي بتلات ادوار الا انها يعني مش بتعبرني ماعلينا .

المهم نزلت وقعدت شوية تشربي شاي يابنتي لا عصير لا ...طبعا انا صعبانة عليها فمش عاوزة تخليني اعمل اي شي .

أحلى مافي الموضوع اننا قعدنا نتذكر أيام العزوبية وايامنا في الشغل الايام دي الي كنا بنزهق منها حسنا قوي بطعمها اليومين دول .. وقعدت تقولي فاكرة لما كانت الاوضة كان فيها انجي واميرة ونرمين ونهلة وانتي وانا ولما كانت كل شوية واحدة تتقمص من التانية ونزهق من الشغل وكل المناكفة مع بعض .. دلوقتي الاوضة معدشي ليها طعم .

ضحكت لان الايام دي فعلا مش هترجع لان في منا الي اتجوز واستقال وفي منا الي ربنا اكرمه وراح الوفد وفي منا الي اتجوز وقعد في البيت وفي الي في اجازة وضع ...بس والله ايام حلوتها مش هترجع ايام كانت حلوة بكل مافيها.

واحنا بنتكلم قعدت اضحك على ايام ما كنا بندخل كنتاكي وايام ماكانت نفسنا بتهفنا نضرب سندوتشات كبدة ومخ ، وايام ماكانت بتحب تخرجني من زعلي واخدنا مركب في النيل وبدل ما تخرجني من الاكتئاب دخلتها انا فيه ......وايام وايام وايام .......ايام عدم المسئولية بجد ليها متعهتها .

الخلاصة اننا دايما مبنحسش بحلاوة المرحلة اللا لما بتفوت ونقعد نضحك عليها ........يعني انا واثقة ان شاء الله بعد ما اولادي يكبروا هقعد اضحك على الايام الي بشد فيها شعري وبصوت كل شوية من تعبي وهحمد ربي على نعمتهم .


وبكرة ولادي يدخلوا مدونتي يضحكوا على الي بكتبوه لان الشي الوحيد الي باقي هو الكتابة والسلام ختام

هناك 5 تعليقات:

مدونة رحلة حياه يقول...

السلام عليكم
فعلا كل مرحلة بتعدى لما بنفتكرها بنحسها بشكل تانى خبرات استفادات مواقف ابتسامات دمعات
وفى الاخر كله بيمشى ويعدى وتبقى الكلمات
دومتى بخير

غير معرف يقول...

ازيك يا بيبو
كل سنة وانتي طيبة
دي كلها مراحل لازم نعدي عليهاوكل مرحلة ليها حلاوتها وتعبها
يارب اولاد اولادك يشوفوا مدونتك ويعرفوا اد ايه انتي حنينة وقلبك كبير جدااااااا
بالتوفيق باذن الله

قلب ينبض بالحب يقول...

مدونة رحلة حياة
**
احلى ما في كلمات كلمة خبرات ،دمتي ودام حضورك

قلب ينبض بالحب يقول...

غير معرف
******
وانتي بصحةوسلامة واولاد اولاي دي بعيدة قوي طموحي اولادي بس هههههههه يعني خفاف خفاف بقى في الدنيا

غير معرف يقول...

ازيك يا بيبو
اخبارك ايه
بقالي كتير اوي مشفتش اي كتابات ليكي
ياريت تطمنينا عليكي دايما

إعلانات

المشاركات الشائعة