الخميس، 26 فبراير 2009

النهاردة فرحي ياجدعان .... بيبو فرحاااااانة




أخيرررررررررررا يا شوباب صدر مولودنا الأول " البنات عايزة ايه " لبدرية طه وبسمة عبد الباسط وخرج للنور اليوم الخميس 26/2/2009 ، في تمام الخامسة والنصف بمكتبة البلد بالتحرير عاوزة اقولكم أنه يوم ماشاء الله لاقوة الابالله كان غاية في الجمال على الرغم من القلق إلى كان جوايا أنا وشريكة الكفاح بسمة حبيبة قلبي كنا رايحين وكاننا داخلين أمتحان والقلق جوانا الا أنه بعد توقيع العقد بدء الهدوء يدخل لنفسنا ، كمان مش عاوزة ااقولكم الدور الي قام بيه الولد أحمد الصباغ فتى المدونات الأول " لقب يالا يا عم أحمد بمليون جنيه " كان أزاي بداية من محاولته تهدئة الجو وبث الطمئنينة في نفوسنا " حلوة بث دي" نهاية بدوره الفطري في التقاط الصور على الفاضي والمليان وبدون أي مقدمات ولا أي مؤشرات تلاقيه بيلقط ليك صور على الفاضي والمليان وانت في أي وضع مش فارقة معاه خالص يابني اسكت مافيش فايدة يبني اقعد بتكلم في مين وحتى لما عمل مداخلة أثناء الندوة كان عاوز يصور وهو بيتكلم.

وطبعا عاوزة ااقولكم تواجد منية النفس " شيرين " صاحبة أيامنا الحلوة " فرق كتير و انها على الرغم من الظروف الي كانت بتمر اصرت تيجي وتشاركني فرحي هي وهدير أختها فرق معاياااااا كتير ربنا يفرحني بيكي يا شوشو يا اختشي قولي يااااااارب ويفرحك بيا قولي امين ياشابة ، كمان كان تواجد البنوتة اللذيذة أسماء رمضان الصحفية بجريدة العالم اليوم وصاحبة صفحة " المدونخانة "، كان ليه أثر كبير قوي في نفسي كفاية بس تبص لوشها الطفولي وصوتها الي كله حيوية ونشاط والي بيبعث عليك الهدوء والتفاؤل ، وكان معاها مدون لذيذ اسمه أحمد فصيل ده تحسه كده أخوك أو حد تعرفه من زمان دول كانوا على قائمة الموجودين ، أما البنت وينكي بقى إلى تعتبر النجمة الذهبية لحفلات المدونين كعادتهها كانت مشرفانا بروحها الحبوبة ومنكفتها في الرايح والجاي، كمان عسقول أه والله عسقول ياولاد عشت وشفته على الرغم من معرفتي بيه عبر عالم المدونات من زماااااااان .

نيجي بقى للكتاب الي كانوا معايا بيوقعوا كتبهم، اسعدني الحظ بمقابلة هبة هاني المسكرة خالص مالص صاحب كتاب ظل راجل التي تتميز بشخصية غاية في الجمال تخليك وأنت لاول مرة بتشوفها نفسك تتعرف عليها وتتكلم معاها حد كده عثل عثل ، كمان هنودة صاحبة كتاب كلام في الحب وأشياء أخرى دي الي طلعت مسكرة قوي وحد عكس ما كنت متصورها خالص بنوتة روحها حلوة وعلى درجة من العقل والحكمة .

في بنوتة بقى كان نفسي اشوفها قووووووووووووي مين دي هقولكم هبة سيد صاحبة كتاب " يوميات أتنين مخطوبين "، من زمان وأنا نفسي أتعرف عليه وحتى أما كنت بكلم الواد ايهاب الشنكوتي أقوله سلملي عليها وأسال عليها كنت بحس اني زي مااكون أعرفها بس عاوزة ااقولكم أنها بنوتة ماشاء الله لاقوة الابالله ربنا يحفظها لاهلها ويكرمها بالخيرر" ده طبعا باثتثناء معيارتها ليا بطولي " البنت عكس الولد اخوها ده خالص بنت عقلة وكمل واخلاق اما الولا ايهاب يا حفيظ ربنا يصبرها عليه ويدي لخطيبته الصبر وطولة البال قولوا أمين .

نيجي للأخ إلى جه بعد أنتهاء الحفل بس طبعا أنا عذرته لانه كان جاي من الشغل وأن عارفة الموصلات عاملة ازاي ، بس مجيته كانت عزيزة قوي عليا مين مين عارفين الولد محمود صاحب مدونة الآلم وآمال وده جه في الاخر بس بجد تواجده اسعدني جدا تحسه كده زي ما يكون حد تعرفه من زمنات وايام .... كمان كان في مدون صغنون كده في السن بتاع 16 أو 17 سنة مش فاكرة اسمه وكان في الصحفي ماجد ابراهيم " الصحفي بالدستور" وده جه في الاخر بسبب شغله ، كمان كان في حسام الهندي الصحفي برضه بالدستور وبص وطل وأيمن فؤاد ده شاب صغنون كده بس شكله دماغه حلوة قوي وعنده افكار تجنن، ومين تاني ااااااه الجميلة ايناس لطفي الي شرفتنا ونورتنا وبرضه كان نفسي اشوفها قوي ، ونهال قاسم زميلتنا في مجلة علي صوتك الي نورتنا بزيارتها والي بجد بحس بصدق احساسها للكل الي حواليها ، وكمان الصحفية هند أمين من مجلة كل الناس ، وكانت منوراني صاحبة مدونة المفقوع مرارتها من حماتها سحر غريب وزوجها استاذ طارق واولادهم الجمال الي وجودهم بجد بيفرق معايا قوي وبياكد ليا معاني حلوة قوي في الحياة ، بالاضافة لهبة إلى شاركتني الفرح بالتليفون وناس كتير اتصلوا بيا وبجد مش عارفة ااقولهم ايه غير أن حب ربنا بيبان ليا قوي انتوا ومعايا ومشاعركم الجميلة الي بتبان دايما، و كمان كان في ناس كتير ماشاء الله بس الاسامي ضاعت للاسف والزهايمر بقى انتوا عارفين السن بقي ...........ههههههههه ، والله أنا كنت سعيدة بكل الي جم وشرفوني ونورني وكل الي قبلتهم والله الفرح الي دخل قلبي النهاردة كان الحمد لله فرح غالي قووووووووووي فرح زاد برؤيتي لناس كنت نفسي اشوفهم قوووووووي وهما عارفين نفسهم ربنا يباركلي فيهم ويجعلهم خير أخوان ليا .

عاوزة أقولكم أن النهاردة كانت الفرحة فرحتين علشان أغلى أنسانة ليا في حياتي لقتها بتتصل بيا وبتقولي أنتي فين بقولها أنتي إلى فين قالتلي انها جنب كنتاكي جيللك متتصوروش فرحي بتواجد أمي في يوم زي ده مش تتعوض أبدا وأنا شايفة الفرح في عنيها صحيح أنا مطلعة عنيها اليومين دول ومش عاوزة أنفذ لها أمنية حياتها الا انها جتلي وهي تعبانة علشان تشاركني يوم زي ده وتكون معايا ربنا يخلهالي وأقدر أنفذ لها أمنية حياتها وأعصر على نفسي ليمونة وافرحها بيا، كمان تواجد مامت بسمة والله كان مسبب ليا فرح شديد وحاسة أن النجاح المبشر للكتاب ده بفضل تواجد امهاتنا الغاليين ربنا يخليهم لينا يارب يارب .

أه صحيح نسيت ااقولكم أني خدت طريحة ممتازة فور دخولي البيت ، لقيت جوز ست أوشا أختي بيتصل بيا وهاتك يا معاتبة يابنتي انتي مش تقولي الميعاد امتى علشان نبقى جنبك ياعم وشغلك ...يا بنتي انتي متعرفيش احنا فرحانين ليكي اد ايه من هنا لهنا وعدته أني أبقى اخدهم معايا مرة تانية ... المرة دي أمتى مش عارفة ... ربنا يخليك ليا ياجوز اختي يارب يارب ويحفظك ليا من كل سوء ويخلي ليا كل الناس الي في قلوبهم حب ليا بحبكم وهفضل احبكم لاخر لحظة في عمري .

أه نسيت أقولكم على شعور حلو قوي حسيته وبسمة بتحضني في نهاية الحفل وهي ماشية ، زي ما اكون عروسة وبتحضن من اصحابي وهما بيدخلوني القفص الذهبي ، بسمة أساسا حنينة قوي بس المرة دي وهي بتضمني ليها حسيت بأحساس غريب قوي مش قادرة اوصفه... مش قادرة ابطل كلام فرحااااااااااااانة قوي ربنا يتم فرحي انا وبسمة يارب يارب قوووووووووووولوا امين

هناك 14 تعليقًا:

رئيس جمهوريه نفسى يقول...

الف مبروك يا بيبو وعقبال باقى السلسه والاعمال الكاملة كان نفسى اكون مع اختى فى اليوم دة بس للاسف الظروف

GiGi world يقول...

الف مبرووووووووووووووووك ياقمر
ربنا يسعد ايامك كلها

نـــــور يقول...

ياخبر
طول ماانا بقرا وانا عمال افطم فى نفسى انى ماجيتش بس لان ظروفى صعبه اوى مكنش ينفع ابقى موجوده مش لان المشوار طويل بس انما لان الكليه كمان فيها معتقل مع اننا فى اول الترم

الف مبروك ياقمر وعقبال كتب جايه وساعتها اكون خلصت جامعه واقدر اجيلك :)

غير معرف يقول...

الف الف الف مليون مبروك ياحبيبتي ويارب دايما يفرحك ويريح قلبك انتي انسانة تستهلي كل خير والله بجد مش كلام وربنا يفرحك دايما ويعوضك خيرا

تحياتي

غير معرف يقول...

رئيس جمهورية نفسه
**************
محمود ربنا يحفظك ويخليك يارب والله ربنا يعلم أني عارفة أن أنت بتفرح ليا قوي لانك ونعم الاخ فعلا ربنا يعزك يارب ومشوار اسيوط مش سهل يامحمود أنا عارفة ربنا يعزك ويكرمك يارب

غير معرف يقول...

جيجي
****
ربنا يسعدك قوي انتي كمان انتي متتصوريش انا بحب الدعاء ده اد ايه ، وانتي اسمك غالي عليا قوي لانه اسم انسانة غالية قوي عليا، ربنا يسعد قلبك قوي ودمتي بكل الخير

غير معرف يقول...

حبيبة
******
ياقمر لاتفطمي نفسك ولاحاجة انا صحيح نفسي اشوفك واشبع منك بس المشوار عرفاه ودراستك انا عارفة اد ايه بتتطلب منك التواجد علشان نشوفك بشمهندسة اد الدنيا ياقلبي .

غير معرف يقول...

أيامنا الحلوة
*********
شوشو ياتؤام الروح ومنية النفس ربنا يكرمك يارب على كلامك الرقيق ده ياغالية على قلبي قوي كفاية وقفتك جنبي في ظروفك دي ربنا يباركلك في والدتك واخواتك يانن عيني ويرحم والدك، وأن كنت استهال زي ما بتقولي الخير الدليل ان ربنا اكرمني بيكي دمتي لي ودامت مودتنا

saragebaly يقول...

الف مبروك عليكم

ويارب يتمم فرحتكم بكل خير

ومن نجاح لنجاح اكبر واكبر يارب

NIDAAL .R يقول...

مبروووووووووك الكتاب الجديد
او مولودكم الجديد
اول مرة اشوف مولود له أتنين ام
هههههههههههههههههههههه

ربنا يسعد ايامكم كلها يارب ويجعلها كلها خير وفرحة وسعادة وتفاؤول

واتمنى لكم غد اكثر اشراقاً .. بأيمانكم بأن الغد هو أفضل .

والف الف الف الف الف الف الف مبروووووووووووووووووووووووووك

غير معرف يقول...

ألف مبروك يا بدورتي .. سامحيني كان نفسي أكون جنبك بس ان شاء الله الكتاب الجاي اكون اول الحضور
ربنا يفرح قلبك يا حبيبتي

رئـــــيسـة حزب الأحلام يقول...

الف مبروك ويارب من نجاح الى نجاح
لولوىىىىىىىىىىىىىىىى
يلا ان شا الله ماحد حوش
يارب دايما فى نجاح

أحمد منصور يقول...

ربنا يزيدكن فرحاًعلى فرح

سندباد يقول...

مبروك ربنا يوفقكم باذن الله
تحياتي الخاصة جدا

إعلانات

المشاركات الشائعة