كل سنة وأنتو عثاثيل

كل سنة وأنتوا طيبين يا شوباب بمناسبة المولد النبوي الشريف، وربنا يعيده عليكم بكل خير ، دلوقتي المفروض اننا كمسلمين نقف شوية مع نفسنا عند مناسبتنا الدينية نعمل محاسبة سريعة لنفسنا، يعني مثلا في مناسبة زي المولد النبوي دي محتاجين نقف كده ونسأل نفسنا ياترى عملنا أيه من سنة نبينا ودافعنا عنه بأيه ولا ذكرى المولد ده بالنسبة لينا حلاوة المولد وعروسة المولد ومراجيح وهيصة وبتاع .

كل واحد المفروض يراجع نفسه هل احنا بنطبق في يومنا اد ايه من سنة نبينا الكريم ، بداية من استيقاظنا من نومنا وذهبنا لشغلنا وفي علاقتنا مع بعضنا وفي سلوكيتنا وفي عبادتنا لازم نقف وقفة صح نراجع نفسنا ونراجع حياتنا الي اصبحت اكل وشرب ونوم وشغل وقعدة مع الاصحاب .

تفتكروا لو رسولنا الكريم عايش معانا في حياتنا كان هيرضيه افعالنا ، هيرضيه شباب حياتهم كلهم مابين الشغل " الي في الغالب مش بيتقوا الله فيه " والاكل والشرب والسهر وفاكرلي نفسه ياما هنا ياما هناك فاكر ان دوره في الحياة بيقف لحد كده ، ولو بصينا عليه هنلاقيه عبارة عن كرة مليانة هواء لو تم تفريغها هنلاقيها فاااااااااضية وهو فاكر نفسه أنه الواد" التوت فروت " الي مفيش منه يا ضنايا ، وأن معرفته دينه وواجباته الدينية أشياء ثانوية ولا تهم ماهو الرك على التربية الي مفهماه انه كفايا وجوده في الدنيا وانه السند والضهر احم احم .

و سيدة حجت بيت الله والكذب لايفارق لسانها علاوة على الالفاظ الخارجة الي بتصدر منها وتفترى على الاخرين كلام لم يقال وتقول على السنتهم كلام لم يصدر منهم والاسم حاجة بيت الله ربنا يهدي قبل ما تفارق حياتها على هذا الوضع.

وأب يقارب على انتهاء العقد الثالث من حياته ومش بيركع لله وفاكر نفسه أنه مدام مكفي بيته وبيروح ويرجع من الشغل كده دوره انتهى ، لاوالله كتر خيرك يااخي بتتعب قوي والبني ادميين الي جبتهم للدنيا دول مش هتتحاسب عليهم اما يطلعوا ومش يلاقوك بتركع لله وبالتالي هيبقوا نسخة منك .

وراجل بلغ من العمر عاتيا وسبحته في ايده ربنا يباركله وفي نفس الوقت عنيه على الستات في الراحة والجاية ... لا والله يا شيخ انت زي الفل ربنا يديك على اد نيتك ياااخي .

و واحدة منكدة على زوجات اوالدها لدرجة أنهم بيتمنوا اليوم الي روحها توصل لربها مودعة الدنيا لينعموا بهذه الحياة .

وسائق في الراحة والجاية بيحلف بالطلاق على اساس ان الحلفان بالطلاق دي الماركة المسجلة للرجالة عجبي على الرجااااالة.

وأم لم تتقي الله في تربية أبنائها وأخرجتهم إلى الدنيا معدومي الشخصية يمشون في حياتهم بمخها ويتصرفون وفقا لاوامرها ووفقا لم تمليه عليهم وتحسب أنها تحسن التربية ولا تعلم أنها في الاخر سوف تحاسب عليهم أمام المولى يوم القيامة وتجعلهم في موقف الشفقة من الاخرين لعجزهم عن أخذ القرار في حياتهم

وابنة لا يشغل بالها غير المظاهر بين المكياج واللبس وفلانة قالت وفلانة عادت هي دي حياتها ربنا يهدي علشان بجد النوعية دي اما بيجي عليه اليوم وتكون ام بيكون اولادها نموذج لايختلف عنها كتير بيكونوا ورقة في مهب الريح .

ولا زوجة حياتها كلها اكل وشرب وتودي العيال المدرسة وتجبهم منهم ولو دورت هتلاقيها عمرها ما قعدت مع اولادها تعرفهم ايه الصح وايه الغلط من الاخلاق والدين وفي الغالب دول بيطلعوا نسخ من الامثلة السابقة وعجبي .

نهاية لان الامثلة كتيرة والواحد لو هيتكلم عاوز سنين يحكي ويتكلم على الي مالي الدنيا ، محتاجين نعمل محاسبة سريعة لنفسنا قبل فوات الاوان وبلاش الاصرار على الي احنا فيه لان الاصرار على الغلط مش بيضر غير صاحبه هدانا الله لما فيه الخير لينا ولديننا وكل سنة وانتوا مثكرين ومعثلين خاااااالص مااااااااااالص هااااااااااااالص