وحشتوني قوووووووووووووووي

لما تلاقي نفسك بتهتم قوي بنفسك ، وبتركز قوي في حياتك في كل شي فيها بكل مافيها وتبقى حريص قوي على حد بعيد عن عينك ومش شفته ، وعلى الرغم من كده بتخاف على نفسك قوي مش علشانك علشانه ده بيبقى شعور واحساس بيعجز اللسان عن وصفه ومش بيشعر بيه غير الي جربه وبس .

ده مش طلاسم ومش فوازير ده احساسيس ومشاعر محدش يعرفها الا الي ربنا انعم عليه بنعمه .........اكده ولا مش اكدددددددددددده

وحشتوني قوي بحلم باليوم الي اشوفكم فيه واشبع عنيا منكم مش بتبعدوا عني ابدا حساكم دايما جنبي بتتحكموا فيا دايما في كل حياتي وانتوا اكيد اكيد عارفين غلاوتكم عندي ........ربنا يجبكم ليا بالسلامة يارب .

طبعا كلامي مفهوم للي يعرفوا بيبو ودول الي يهموني.. ويارب يدعولي في صلاوتهم قوي على اد حبهم ليا يدعولي جامد موت ربنا يمتع عيني بحبايبي

وحشتني الايام دي قوي

نظرت إليهم حسدتهم على هم فيه من مشاعر وأحساسيس تمنت لو كانت تعيشها

ذهبت بذاكرتها إلى تلك الأيام التي كان النوم يذهب عنها وتجلس الليل بمفردها تنظر إلى أوراقها وتلتهم مافيها

وتظل تستمتع بليلها بمفردها كما لو كانت تتغزل في مذاكرتها وكتبها

فهي في تلك الايام كانت تشعر بأنها مازالت تحيا ، فجو الامتحانات والمذاكرة بالنسبة إليها من أحب الاوقات الي قلبها

تمنت أن تقف في موقفهم وهم يراجعون في الساعات الاخير قبل دخول اللجان

في هذه اللحظات قررت ان تكمل دراستها العليا في العام القادم / نظرت حولها لتجد أن عليها نزول المحطة القادمة استاذنت البنات اللائي امامها وتبسمت لهم متمنية لهم التوفيق والنجاح في حياتهم

وحشتوني

السلام عليكم ورحمة الله وبركاته.

أزيكم عاملين ايه يارب تكونوا تمام طبعا وحشتوني زي ما وحشتكم بالظبط.....معلش أتاخرت عليكم اليومين دول أصلي كنت مشغولة حبتين في الشغل حبتين الأحداث الي كانت على الساحة الفترة الي فاتت يعني وفاة شيخ الأزهر وتولي الشيخ الجديد وتقرير عنه وكلام من هذا القبيل.

نيجي بقى للمهم ....عاوز أسالكم سؤال صغنون كده هو أنا أما أكون مبسوطة وماشية مبتسمة لازم يكون في حد وراء الابتسامة دي لازم يكون في حب في حياتي أو في إنسان سبب لسعادتي مينفعش أكون بشوشة وعادي وماشية مبتسمة .

هقولكم أيه سبب كلامي في بنوتة كده كل ما تشوفني مبتسمة وده في الغالب طبع فيا مبعرفشي أمشي مبوزة .. الاقيها بتقولي وبخباثة كده ...هو الجميل مبسوط ليه حب جديد ولاأيه ؟ أقوم بصة ليه وقايلة هو لازم أكون سعيدة علشان في حياتي حب ..تقوم ردة وتقولي يعني امال ايه الي يخليكي ماشية متفائلة كده بصراحة بقى هنا أقوم متعصبة وأقولها لا ياستي أن كده لوحدي واخدة اقراص فرح شوية.

وطبعا دي مش أول حد يقولي نفس البوقين دول طنط جارتنا من يومين مقبلني في الميكروباص ازيك وعاملة ايه وكلام من هذا القبيل وبعدين نزلنا مع بعض واتمشينا لحد البيت وأحنا في الطريق قامت قايلة ليا عاملة ايه في حياتك قلتلها فل الفل ياطنط الحمد لله تمام تقوم تقولي هو في حاجة ولاايه في الطريق أقوم ردة عليها وقايلة لها ياطنط هو أنا هتجدد عليكي تقوم ردة وقايلة لا الحقيقة انتي علطول كده حتى وانتي في اي ازمة بتكوني بتضحكي قمت قلتلها وانا بكبر في سري حقيقي " الحمد لله".

السؤال بس الي فاقع مررتي هو السعادة والرضا لازم يكون وراه حاجة... مش ينفع الانسان يكون سعيد لان ربنا اكرمه بصحته وأنه وسط اهله وأنه متميز في عمله ياسبحان الله ...هل يلزم أن يكون هناك شخص في حياتنا علشان يكون وراء السعادة ومن الذي يضمن أن يكون هذا الانسان مصدر سعادة لنا سبحان الله ..نهاية اللهم ارزقنا الرضا بما قسمت لنا .