الثلاثاء، 6 أكتوبر 2009

دكر بط


الصبح خارجة من البيت وحالتي المزاجية ميت فل وعشرتاشر وده بفضل كوب اليانسون الي الحاجة شربتهولي بالعسل الابيض الي شربته اجباري بعد جولة من الجري وريا في الشقة " بدل مج الشاي عااااااا" مع دعوتين حلوين وماشية وانا مفرفشة كده ومتسلطنة وايه كاني فراشة بتطير في السماء ده لاني قريبة من السما بحكم طولي يعني



قم ايه ركبت الميكروباص ، وانا مزئططة كده وفريش خالص ، لكن منه لله "دكر البط" الي نرفزني وخلى الدم يطلع لنفوخي وكنت هيجري لي حاجة ... هقولكم اهو مين "دكر البط" ده .. وانا راكبة الميكروباص وبعد يجي ساعة كده وربنا اكرمنا والميكروباص خلص تحميل وده لان النهاردة اجازة رسمية بمناسبة ذكرى التاسع من اكتوبر ...الا والاقي صوت طفل بيعيط ابص يمين وابص شمال اشوف الصوت ده جاي منين مش شايفة حاجة ..قلت بيني بهلوس ياولاد وده نتيجة لاني مبطلة الشاي يجي من عشر ساعات كده ... بس لاقيت الصوت علي تاني ... ابص مش لاقيا حاجة ...قلت بس انتي محيرة نفسك ليه يابيبو دي تلاقيها رنة جديدة للموبيل بس انتي مش واخدة بالك لان موبيلك ماركة " الي فات قاديمه مات"..

المهم ماعلينا وصلنا ونزلنا من الميكروباص وانا نازلة لقيت الصوت تاني بصيت والحمد لله لاقيت المصدر اتاريه كان طالع من جنب عمو الي كان قاعد قدامي وانا فاكره انه هو الي قاعد لو حده في الكرسي ومستغربة قاعد ليه على الكرسي الي بيقعد عليه اتنين بس اتاري كانت مراته قاعدة جنب دراعه وشايلة الولد وانا نظري ضعيف ومش واخدة بالي منهم وده لان عمو ماشاااااااااااااء الله فور باي فور



المهم عمو مشي قدامي هو و طنط مراته .. وعمو بسم الله ماشاء الله عليه ...حاطط ايده الاتنين في جيوبه وابص على طنط مراته الاقيها شايلة شنطة البيبي في ايد وشنط هدوم البيبي في الايد التانية والولد بيعط ..بعيد عنكم انا شفت المنظر ولاقيت وشي احمر والدم نطر في عروقي وضرب في راسي واتجننت ..ولاقتني ماشية بكلم نفسي هو ياربي البعيد باااااااارد ولا ماله شايف مراته شايلة الولد وشايلة الشنطة وسامع بكاء ابنه مش شيله عنها شنطة علشان تعرف تشوف الولد ماله بيعيط ليه بدل ماهو عامل زي " دكر البط" الي ريشه منفوش والا البعيد ماله ياربي مبيحسش.. المهم انا بصيت ليهم مرتين والولد بيعيط وهما ماشيين ورايا ان البعيد يفهم ابدا انه يحس ابدا



المهم دخلت ركبت المترو وانا قاعدة دماغي هينفجر وبسال نفسي ...هي الرجوله راحت فين ...اختفت ولا ايه ولا الراجل بيكون في مواقف معينة راجل " وقت ما بحيب يكون راجل" وموافق تانية لا ...وازاي البعيد يوافق انه مراته تمشي شايلة ده كله وهو ماشي كده هي الجارية الي والده ووالدته اشترالهالوه ولاايه.. وانا سالت نفسي وقلت اكيد هو برضه طلع لاقى والده بيعامل والدته كده علشان كده ده مش غريب عليه بس برضه ده مش يشفع ليه ...وبعدين فكرت وقلت ماهو لو فاهم الاسلام صح وازاي كان الرسول الكريم بيعامل زوجاته كان عرف ان الاسلام والدين مش صلاة وصوم وبس ده نظام حياة ومن نظام الحياة اننا نعامل زوجاتنا بالحسنى ..الي رسولنا الكريم كان بيعامل بيها زوجاته لدرجة انه كان بيامر الي بيسوق الجمال يسوقها بهدوء اما يكون نسائه في الهودج ... الموقف بجد غظني يمكن لاني الحمد لله اتربيت على التعاون وشفت ناس قريبة جدا مني بيعاملوه زوجاتهم باسلوب كويس وحطنهم في عنيهم الموقف نرفزني ... بس بجد ياريت الرجالة يكونوا رجالة بجد مش " دكر بط " والسلام ... والي بقى ماشاء الله منتشرين قوووووووووووووووي اليومين دول


هناك 7 تعليقات:

أيامنا الحلوة يقول...

ياااااااه شوفتي الحادث الفظيع ده وانتي لوحدك وقدرتي تمشي على رجليكي الحمج لله انك وصلتيلي بالسلامة من غير عربية اسعاف هههههه
يابنتي المناظر دي منها كتير مبقاش في تعاون الراجل بيشوف ان ده بيقلل منه وان الجرية اللي معاه هيه اللي تتحمل كل شئ

بس للحق بردو في رجالة بتقدر ستاتها وربنا يرزقنا حسن الاختيار

تحياتي ياوزة

romansy يقول...

لالالالالالالالالالالالالا
مش كل الرجاله متظلميش الكل
فيه ناس فاهمه وواعيه ان الزواج مشاركه ومسئوليه مشتركه
بس الموقف دا ليكى حق تتنرفزى وهو حاطط ايديه فى جيوبه كده ومراته بتخيلها كده لا حول لها ولا قوه
ربنا يهدى

على الطريق يقول...

معلش يا بدورة
متزعليش نفسك
المشكلة انه فور باي فور
يعني ملوش عذر

http://kasperb4.blogspot.com/ يقول...

ههههههههه

لعلمك بقا انا لما اتجوز كده ان شاءالله هعمل زي دكر البط وناوي اطلع عين اللي هتجوزها واخليها تشيل كل حاجة وامشي انا فاضي

وبعدين انتي حسيتي انها مدايقة ؟
ماهو تلاقيه هو كمان تعبان وطالع عينه ف حاجات تانية كتير وهي ولا بتقوله خلي عنك
P:

http://kasperb4.blogspot.com/ يقول...

بقالي كتير مجيتش هنا

وحشتني والله المدونات اوي

:)

سندباد يقول...

اولا اشكرك لمرووك علي سفينتي ولو انه شكر متاخر اوي ثانيا جميله اوي مدونتك ثالثا دمك خفيف
تقبلي تحياتي

momken يقول...

عندك حق فى جاله كتير انطاع كده
تعرفى بس الغريب بيكون ان الست هى السبب فى ده

بس ست تانيه

اقولك ازاى ست تانيه
مثلا الراجل واخد مراته وانبه ورايحين لامه زياه
تلاقيه لما يقرب يشيل مراته العيال والشنط وممكن يشيلها الهم كمان
علشان امه القرشانه واخته السوسه ميقولوش عليه خروف ومراته ركباه ومشيلاه وماشيه هى هانم

يبقى الست الى عامله كده فى الست

بيلموا على الرجل الجنتل

سيبك انتى
قوليلى صحيح

ليه كل ما حد يروح يزور حد يقوله هدبحلك دكر بط
اشمعنى دكر البط الى بيندبح
عمرى ما شوفت حد قال لحد ادبلحلك نتايه بط

هما الدكره ليه مضطهده كده فى مصر

طيب لما دكره البط تخلص هنعمل ايه
البطات هتتجوز ايه ديك رومى-

من مانى هذا اناشد الاخوة فى الريف المصر
ارحموا دكر البط وركزوا من البطه اخذا بمبدا المساوة فى الدبح عدل


تقبلى تحياتى

إعلانات

المشاركات الشائعة