كل سنة وأنتوا مسكرين

كل سنة وأنتو طيبين بقدوم العام الهجري أولا و الميلادي ثانيا ، بس ياريت بداية العام مش تمر علينا مرور الكرام كده ، محتاجين نقف مع نفسنا وقفة كده ونسالها يا ترى ايه الي كنت رسمه للسنة إلى فاتت دي وربنا أكرمني وحققته ، أيه الي مقدرتش احققه واقف عليه أعرف منه أيه الأسباب الي مخلتنيش اوصل للهدف .

مع السنة الجديدة محتاجين نجدد النية ونبث في نفوسنا الأمل من جديد وندخل السنة واحنا على يقين أن العام الجديد هيبقى أن شاء الله عام فتح علينا في كل شي ، وننوى أنه يكون عام زيادة في الخير وبعد الشر والمعاصي ، وأن عام بداية لتغيير نحو الأفضل بالفعل ، عام بأذن الرحمن يكون بداية لفتح للأمة الي تغييرها هيبدأ مننا يوم ماكل واحد يبدأ من التغيير من نفسه بدل ماهو مستني التغيير الخارجي ، علشاننغير واقعنا بجد محتاجين نتغير احنا من جوانا .

مع بداية السنة الجديدة بتمنى من الله أنه يحقق ليا كل ما أتمنى من قرب منه و يرزقني بر اهلي لان ده بجد أمر مش سهل و يكرمني بتكوين أسرة مسلمة قولولي انتوا بقى بتتمنوا أيه في السنة الجديدة وكل سنة وانتم بالف صحة وسلامة

جاري البحث عن راااااجل

اولا كل سنة وانتوا بخير وينعاد عليكم بالخير ده أولا ، ثانيا بقى عاوزة ااقولكم شي في ناس كتير غايب عنها ايه هو الشي ده ، استنوا الاول هقولكم ايه سبب اني هتكلم في الموضوع ده النهاردة ... اصلي كنت بتكلم مع بنوتة عسولة خالص مالص اسمها ايه حبيبة دي بقى لسة عرفها من يوم واحد بس كده حاسة زي ما اكون عرفها من زمان قوي زي ما تكون اختي او انتمتي ... المهم يعني واحنا بنتكلم قامت اتلمضت عليا وقالتلي ازاي القمر قاعد كده من غير ارتباط .

قوم ايه قررت النهاردة ابعبع واكتب عن شوية حاجات ، كتير بنتسئل السؤال ده ، يعني بعض الناس فاكرين اننا بنترفع عن الجواز أو اننا بنغالي في طالبتنا أو سوء الاحوال الاقتصادية ... كلا ثم كلا الموضوع أننا نفسنا في راجل بمعنى الكلمة ... ايوة رااااااااااااااااااجل كلامي مش فذلكة أو فلسفة بس فعلا مافيش راجل بمعني الكلمة راجل تحث معاه بالامان، اه سامعة حد بيقولي يعني ايه الامان من مفهوم المراة بص ياسيدي انت وهو الامان انها تحس في كنف راجل بيقضى ليها كل احتياجاتها وده طبعا في حدود امكانياته انها وهي معاه حاسة انه مافيش اي شي سي هيحصل لها وده لانه ضهرها وايه تاني اه واحد بيحبها حب حقيقي ايوة من غير سؤال يعني ايه حقيقي يعني حب بيتعبر عنه خارجيا وداخليا يعني مش مشاعر وبس ... اه قبل ما الاقي حد بيقول اننا ماديين... بس هو ده تعريف المودة الي اتكلم عليها القران وهو التعبيرعن الحب وليس الحب عبارة عن مشاعر وبس وأنما هو بلورة للمشاعر دي في تصرفات كل واحد وحسب التصرفات الي تبين للطرف التاني انه بداخله مشاعر ليه ، وايه تاني معني الرجولة اه ...يعني الواحد الي يفهم طبيعية المراة ويقدر يحتويها احتواء كامل على كافة المستويات ويستحملها في كل ظروفها يعني مش في اوقات السعادة وبس ، وكمان ايه اه واحد يقدر عقلها وانها قادرة على انها تشركه في كل شئون حياته، ويقدر يستحمل علشانها حاجات كتيرة .

يعني من الاخر المشكلة اكبر من كونها ظروف اقتصادية وبتاع ... الموضوع اننا عاوزين نتجوز جواز ابدي يعني عاوزين حد نكمل معانا العمر كله مش على سبيل التجربة ... اه التجربة اصلي اكتشفت كارثة فظيعة على لسان بعض الشباب قال ايه والله لو كانت كويسة ومشيت على العجين متلخبطوش تعيش مكنتش مع السلامة ... ياحلاووووووووة ، الواحدة بقت فار تجارب .. ، يتجرب فيها والطلاق الي ابغض الحلال بقى سهل قوي وبقى عقاب للي مش هتتظبط والله بقت وكسة كبيرة شباب مش عارف يعني ايه معنى كلمة جواز فاكرها رحلة هيروحها يومين تلاتة ولو مش عجبته يرجع منها والله حاجة غريبة ياولاد وحاجة تحرق الدم وتجيب الضغط يالا بلا وكسة ...

شوفتوا بقى ان الموضوع مش موضوع لا احوال اقتصادية ولاموضوع مغالاة في ترتيبات الجواز الكارثة ان الرجولة في سبيلها للانقراض وعلى فكرة انا وكل البنات معدناش بنحب مثل " ضل راجل ولا ضل حيطة " ويالا فوتكم بعافية