وضاع زمن الرقة ياولدي

كل يوم في رحلتي لعملي بحب اركب عربية السيدات من باب انها مننا وعلينا ويعني لما بنام بصحى وانا مش مخضوضة ولا مضايقة وخصوصا اني من الناس الي بيبقى ليها طقوس في النوم يعني مااحبش حد غريب " الجنس الاخر " يشوفني وانا نايمة .

المهم كبس عليا النوم قوي ومقدرتش اقاومه لاني في الغالب كل اما انام اصحى الاقي نفسي في جمال عبد الناصر واضطر ارجع محطة تاني ، ماعلينا المهم نمت وخير اللهم اجعله خير الاقيني بصحى على صوت غريب زي ما يكون كده صوت الشويش عطية طبعا اتسرعت وعنيا برقت ولقتني مذبهلة ولان الدنيا زحمة فانا مش شايفة مين صاحب الصوت قمت بصيت حواليني علشان اتاكد اني لسة في عربية السيدات ومحدش اخدني لعربية الرجالة واغتلت لقدر الله والحمد لله لقيت كل الي حواليا من نوعي حمدت ربنا وبدأت افوق بقى اشوف ايه مصدر الصوت ده.

بسأل في أيه ياجماعة قالولي واحدة بتتخانق مع واحد ركب العربية غلط المهم أنا بدأت أتابع الحوار بنفسي ولاني مش شايفة مين بيكلم مين بس الي وصلني صوت رجالي بيتكلم باحترام شديد وبيتأسف وصوت نسائي يعلو عليه في الصوت والنبرة الراجل بيتأسف وبيحاول يلم الموقف ودي مش عاوزة تفوت الامر وعمالة تقول كلام غريب قوي من باب انه راكب قاصد وانه بيحب يركب مع السيدات وكلام من هذا القبيل والغريبة اني مش وصلني اي رد فعل من الراجل غير انه عمال يقولها انا مش هرد عليكي وهي دماغها والف بتاع لا رد وانا قادرة اني ارد على عشرة زيك كنت خلاص هشد في شعري وعاوزة اوصل لها وافتح بوقها واشد الاحبال بتاعتها علشان تبطل والحمد لله دخلنا المحطة والراجل نزل وبلاش ااقول ان صورتها كانت قدام الجميع سيئة للغاية وخاصة ان الراجل مغلطش وكان بيحاول يلم الموضوع .

خلاصة الموضوع أن انا دايما شايفة أن الست حتى لو في المواقف الي تحتاج حزم مافيش داعي انها تعامل الراجل بالند ، مش علشانه لاعلشان نفسها وعلشان تحفظ ماء وجهها أصل مش من المفترض ان الراجل لما يلاقي صوتها بيعلي انه يخاف أو انه يلم الموضوع لا بالعكس هي كده بتسفزه انه يتطاول عليها ويورلها يعني لو انتي فاكرة نفسك قوية في الاقوى منك وياريت الموقف هينتهي لكده لا ممكن يوصل الامر انه يتطاول على زوجها او والده وانهم اصحاب شخصية ضعيفة علشان كده طلعوا واحدة بالاسلوب ده .

نهاية في اساليب كتير ممكن ناخد من خلالها حقوقنا من غير علو صوتنا أو أننا نعمل رأسنا برأس الي قدامنا الست ست برضه صوت منخفض ورقة في التعامل ولا التطور كمان وصل لطبيعتنا الي ربنا فطرنا عليها ولا أنتوا أيه رأيكم

قلبي ينبض بحبكم

لأن الحب أساس لكل العلاقات بمختلف أنواعها وأشكالها ولأن الحب الحقيقي هو الي بيدي للحياة طعم سميت مدونتي بالأسم ده .

لأني هعيش بالحب وفي الحب وللحب حبيت أكون في وسطيكم من تاني في عالم لايجمعه غير الحب وبدون أي مصالح أخرى.
بحبكم